Martin Scorsese është duke përgatitur një film të ri për Bob Dylanin

Netflix ka bërë të ditur se Martin Scorsese do ta bëjë regjinë e filmit dokumentar për turneun e Bob Dylanit, Rolling Thunder Revue”.

Siç transmeton The Guardian, strukturën e filmit do ta përbëjnë intervistat e shumta që i ka thënë kantautori i famshëm amerikan.

Regjisori i shumë filmave të suksesshëm, Martin Scorsese (Foto: Vittorio Zunino Celotto/Getty Images/Guliver)

Ngjarja do të bazohet në vënien në pah të shpirtit të trazuar të Amerikës në vitin 1975 dhe muzikën e gëzueshme që Dylan e ka interpretuar në vjeshtën e atij viti.

Variety njofton se filmi do të jetë më i thjeshtë se dokumentari i Scorsese nga viti 2005 rreth jetës së Bob Dylanit, “No Direction Home”.

Ai film ishte përqendruar në ngritjen e artistit drejt famës, zhvendosjen në New York, si edhe pensionimin e përkohshëm pas një aksidenti komunikacioni në vitin 1966.

“Rolling Thunder Revue” ka qenë një karvan muzikor që kishte filluar në tetor 1975 dhe kishte mbaruar në maj 1976.

Gjatë atij turneu, Dylan i ishin bashkuar artistë të shumtë, si Joni Mitchell, Joan Baez, Mick Ronson, Bette Midler, Roger McGuinn, Emmylou Harris e Allen Ginsberg.

Lansimi i dokumentarit të ri do të ndodhë më vonë gjatë këtij viti. /Telegrafi/